SELEBRASYON SA IKA-67TH ARAW NG ZAMBOANGA DEL SUR MALAMPUSONG GIBUKSAN

Pagadian City (September 12, 2019) – Malampusong gibuksan ang ika-67^th nga kasaulogan sa Araw ng Zamboanga del Sur adlaw nga Martes, Septembre 11 nga nagdala sa makahuluganon nga tema: “Hawak Kamay Tungo sa Tagumpay: Angat ang Bawat Zambosurians”.

Pormal nga gisugdan ang usa ka semana nga selebrasyon pinaagi sa masadya ug mabulukon nga Color Fun Run nga pinakaunang gihimo sa probinsya ilalom sa bag-ong administrasyon. Nilibo-an ka mga partisipante ang misalmot sa maong aktibidad nga gitapos sa Blue Oval sa Provincial Government Complex gikan sa tulo ka starting locations sa centrong bahin sa siyudad.

Human sa maong event, pormal nga gihimo ang ecumenical mass ug grand ritual opening sa Megayon Stage timaan sa pagsugod sa kasaulogan. Ang opening ceremony gitambongan mismo sa amahan sa probinsya, Gov. Victor Yu, 1^st District Congw. Divina Grace Yu, 2^nd District Cong. Leonardo Babasa Jr., Vice Governor Roseller Ariosa, Pagadian Mayor Sammy Co, Major General Roberto Ancan sa 1^st Infantry Division, PNP Regional Director Brig Gen Froilan Quidilla, DILG Regional Director Faisal Abutasil, Napolcom Regional Director Atty. Pablito Abad, Provincial PNP Zambosur Director Redentor Retusto, board members, ug mga opisyal sa nagkalain-laing buhatan sa local nga pangagamhanan.

Mihatag sa iyang welcome remarks si Cong. Leonardo Babasa diin iyang gisaysay ang pagpaningkamot sa lalawigan nga mabatonan ang political integrity ug accountability ug mahimo lamang kini pinaagi sa hiniusang pagpanlimbasog sa tanang katawhan.

Nahimong pinasidunggang bisita karong tuig ang Kalihim sa Department of Interior and Local Government nga si Sec. Eduardo Año diin gipaila kini sa first lady sa probinsya nga si Congw. Divina Grace Yu.  

Gipahayag ni Sec. Año nga ang Megayon Festival usa ka pagpasidungog sa kabantugan sa mga Zambosurian ug ang mabulokon nga kasaysayan sa probinsya.

Iya usab gipaabot sa bag-ong administrasyon ang iyang pagdayeg sa probinsya diin gihisgotan niya ang mga maayong butang nga nahimo sa liderato ni Gov. Victor Yu ilabi na ang pagpatunhay sa prinsipyo sa “good governance”.

Gihagit ni Ano ang mga Zambosurian nga himoon ang ilang partisipasyon sa lokal nga pangagamhanan aron maabot niini ang gidamgo nga mahimong usa sa mga leading provinces sa tibuok nasod ang Zamboanga del Sur.

Matud pa sa kalihim nga kon ang lalawigan magkahiusa, dili imposible ang pagkab-ot sa mga pangandoy ug tinguha niini.

Sa mensahe ni Gov. Victor Yu, iyang gipadayag nga ang milabay nga 67 ka tuig nahimong aninag ug hagit alang sa bag-ong administrasyon. Dugang pa niya nga usa kini ka pasiuna nga pasundayag ilalom sa iyang pagpamuno.

Gusto sa gobernador nga mismo ang mga katawhan ang mosinati sa kalainan sa kasaulugan karon ug sa mga milabay nga kapanahunan.

Sa gihapon, gipasabot sa amahan sa lalawigan nga bisan pag unsa kamaayo sa pagdala sa gobyerno apan kon walay partisipasyon ang mga katawhan, dili kini magmalampuson.

BAG-ONG PCL CHAIRPERSON NGA SI TEOMILA NOBLEZA PORMAL NG MILINGKOD ISIP EX-OFFICIO BOARD MEMBER SA LALAWIGAN

Pagadian City  (Septembre 6, 2019) - Pormal na nga milingkod isip usa ka ex-officio board member si Teomila Aclon Nobleza human siya mapili nga chairperson sa PCL kon Philippine Councilor’s League sa lalawigan kaniadtong Lunes, Septembre 2.

Sa ekslusibong pakighinabi sa Provincial Press Bureau kang Nobleza, giisip niya nga usa ka dakong responsibilidad ang bag-o nga posisyon nga gisangon kaniya isip lider sa mga SB members ug city councilors sa probinsya.

Matud pa ni Nobleza nga kanhi SB member sa lungsod sa Mahayag sulod sa 6 ka tuig, dili na bag-o kaniya ang pagdumala tungod kay naggikan siya sa pamilya nga dunay background sa pulitika ug matud pa niya nga naa ang iyang kasingkasing sa public service.

Gisaysay ni Nobleza atol sa atong pakighinabi kaniya ang gitawag ug TRINITARIAN APPROACH nga mao unyay mahimong sumbanan sa iyang programa alang sa duha ka distrito sa probinsya.

Naglangkub sa iyang mga plano ang programa alang sa kinaiyahan diin iyang gitinguha nga mas mapalambo ang gitawag ug “tree parenting” sa mga kalungsuran apil na niini ang mangrove planting sa mga coastal areas.

Kabahin usab sa mga programa sa bag-ong PCL Chairperson ang social services nga buot niyang ipaabot dili lang sa iyang distrito kondili lakip na usab sa ikaduhang distrito pinaagi sa paghimo ug mga medical missions.

Ikatulo sa iyang mga laraw ang pagpatunhay sa dialogue program alang sa pag-ugmad sa relasyon sa tulo ka mga tribo nga nagalungtad sa lalawigan sama sa mga Moro, Subanen ug mga Kristiyano.

Sa katapusan, gipaabot ni Nobleza ang iyang dakong pasalamat kang Governor Victor Yu ug Congw. Divina Grace Yu sa ilang dakong pagsalig kaniya nga huptan ang maong posisyon. Sigon pa niya nga kalipay para niya ang mahimong involved sa mga katawhan sa komunidad tungod kay mao kini ang iyang adbokasiya sukad pa sa iyang termino isip Sangguniang Bayan member.

Mga PDL sa Provincial Jail gipaabot ang ilang pasalamat ngadto kang Gov. Victor Yu

Pagadian City (Septembre 6, 2019) - Sa eksklusibong pakighinabi sa designated commander sa mga inmates sa Provincial Jail sa lalawigan sa Zamboanga del Sur, gipaabot niini ang ilang dakung pasalamat ngadto kang Gov. Victor Yu tungod sa gamay nga kaharuhay nga ilang natagamtaman ubos sa pagdumala sa bag-ong administrasyon.

Sigun pa niya nga sa siyam (9) ka tuig niya sa pagkabilanggo karun pa lamang siya nakabati nga adunay kausaban ug gihatagan sila ug pagtagad sa anaa sa taas nga katungdanan.

Kahinumduman nga sa wala pa nahimamat sa Provincial Press Bureau ang maong PDL nagpadala kini ug usa ka sulat pasalamat nga gi address sa gobernador ning lalawigan diin gipaabot niini ang iyang dakong pasalamat ngadto sa bag-ong administrasyon gumikan sa bag'ong sistema nga nakatabang kanila sulod sa bilangguan.

Base sa duha ka pahina nga gi sulat sa maong PDL iyang gi say'say ang iyahang dakong pasalamat ug kalipay sa maayong pagdumala kanila bisan paman sa pila pa lamang ka bulan nga paglingkod ila nang nakita ug natagamtaman ang mga kalambuan ug kausaban.

Matud pa niya, isip gitahasan nga lider sa maong jail aduna siyay mga balaod usab nga gihimo ug gipatuman aron adunay makita nga pag bag-o ug mahimung magmalinawun sila.

Gituyo nila paghimu ang maong mga balaod aron maipakita nga bisan tuod mga binilanggo sila malinawun sila ug adunay respeto sa matag-usa. Dugang pa niini sila nagalaum nga dili lang unta karun lamang kini nila matagamtaman apan hangtud na gayud sa katapusan nga administrasyon.

Sila nagpasalamat pag usab gumikan kay walay imposible ug gi dungog ra gayud sa labawng makagagahum ang ilang mga pag ampo bisan paman sa ilahang mga pagkamasalaypon ug mga kalapasang nabuhat gi hatagan sa gihapon ug panahon ilabina sa ilahang mga panginahanglanon sa matag adlaw.

Samtang sa laing bahin, gipaabot usab sa bag-ong appointed OIC Provincial Warden, Liberato Bongcawil ang iyang pasalamat ngadto kang Gov. Victor Yu sa iyang paghatag ug pagsalig ngadto kaniya isip maou mudumala sa maong jail.

Siya nisaad nga iyang paningkamutan kutob sa iyang mabuhat nga iyang mahatag ug mapatunhay ang gihandom nga kaayohan ug kausaban ngadto maong provincial jail.

Gibutyag usab niya nga adunay 509 nga mga inmates 22 ka mga babayi ug 487 ka mga lalaki diin ang tanan kanila ang nakatagamtam sa patas nga pagtratar.

KAGAMHANANG PROBINSYAL SA ZAMBOANGA DEL SUR, GIHATAGAN UG KATIN-AWAN ANG ISYU SA KAKULANGON SA TAMBAL SA ZDSMC

Pagadian City (Septembre 5, 2019) - Gihatagan ug katin-awan sa kagamhanan probinsyal ang isyu mahitungod sa kakulangon sa tambal sa Zamboanga del Sur Medical Center nga nahimong mulo sa mga katawhan nga giserbisyuhan sa maong balay-tambalanan.

Sa ekslusibong pakighinabi kang Board Member Atty. Baldomero “Baleleng” Fernandez, iyang gipahayag nga aduna nay gihimong lakang ang probinsya aron masolusyonan ang maong problema.

Sa usa ka opisyal nga statement gikan kang Gov. Victor Yu nagkanayon kini nga dugay ng mitikang sa bidding procedures ang probinsya apan kadaghan na kini napakyas tungod kay walay bidders nga mitando sa hinungdan nga maalkansi sila sa pamantayan nga gipahiluna sa Drug Price Reference Index sa Department of Health.

Ang maong polisiya nagtagana ug low ceiling prices kon ubos nga presyo sa mga tambal ug medisina apan wala pay labot niini ang gasto sa pagdeliver rason nga moatras ang mga bidders kay malugi kuno sila.

Aron masulbad ang problema, gi-apply sa probinsya ang gitawag ug Small Value Purchase diin ginagmay lang nga kantidad sa mga tambal ang mapalit rason nga nakatagamtam ug shortage sa medisina ang provincial hospital. Dili usab mahimong permanente ang maong pamaagi tungod kay nag-warning ang Commission on Audit nga buhaton lamang kini kung dunay emergency cases.

Gidugang ni Atty. Fernandez nga mismo si Governor Victory Yu ang mihangyo sa konseho sa lalawigan nga mahatagan siyag authority nga makapanday ug usa ka Consignment Committee subay sa procedures sa Republic Act 8194 kon Government Procurement Reform Act.

Matud pa sa statement ni Gov. Yu, ang consignment scheme usa ka legal ug mas paspas nga pamaagi aron ma-address ang problema sa tambal sa ZDSMC. Mao usab kini ang kasagaran nga gigamit nga pamaagi sa mga LGU ug government hospitals sa nasud.

Sa Consignment scheme, ang probinsya mahimong mag-accredit sa mga pharmaceutical dealers ug suppliers nga mahimong consignors diin makabutang sila ug mga tambal nga ibaligya sa parmasiya sa medical center ug mobayad lang unya ang ospital sibo sa kadaghanon sa nahurot nga tambal  gamit ang income nga nakuha sa mga gi-consign nga supplies sa gikatakdang panahon.

Aprubado na sa konseho ang maong hangyo ni Gov. Yu sa milabay nga session sa Sangguniang Panlalawigan ug i-followup na lamang ang opisyal nga resolution kalabot niini.

Sa katapusan, gipamahayag ni Board Member Fernandez nga dili kini masulbad sa madaling panahon apan iyang gipasalig nga gihimo sa provincial government ang tanang aksyon aron mapatunhay ang tinuod nga serbisyo ngadto sa katawhan sa Zamboanga del Sur.

Pinakaunang Inter-Office Sportsfest sa Zamboanga del Sur Provincial Gov’t, Pormal nga Gibuksan

Pagadian City (September 2, 2019) - Pormal nga gibuksan karong adlawa, Septembre 2, 2019 ang pinakaunang Provincial Government Sportsfest alang sa 67^th Araw ng Zamboanga del Sur nga gipahigayon atol sa Monday Flag Raising Ceremony sa Kapitolyo.

Ang sportsfest pagasalmutan sa mga empleyado sa pangagamhanang probinsyal nga modula sa nagkalain-laing sports sama sa basketbol, badminton, table tennis, lawn tennis, volleyball, firing ug uban pa.

Gibahin sa mga cluster ang mga opisina sa kapitolyo ug maoy magsangka sa mga sports events nga pagabuhaton sa Provincial Covered Court ug sa Dao Government Complex.

Sa pagpamulong ni Governor Victor Yu sa flag raising ceremony, gipahayag niya nga ang maong aktibidad usa ka pamaagi aron mapalig-on ang panaghiusa ug relasyon sa mga empleyado sa kapitolyo.

Dugang pa niya nga ang upat ka adlaw nga inter-office sportsfest magabilin unya ug maayong panumduman pinaagi sa pagtangtang sa gitawag ug boundaries sa matag departamento ingon nga ang mga kawani nagatrabaho sa usa lamang ka pangagamhanan.

Dungan nga nanumpa sa pledge of sportsmanship ang mga officiating personnel ug mga magdudula isip timaan sa ilang pagsunod sa mga rules and regulations sa mga dula.

Pormal nga gideklara ni Provincial Sports Committee Chairman Cesar Julu Dacal ang pagsugod sa mga dula samtang gipangunahan ni Gov. Yu ang ceremonial tossing didto sa covered court sa Kapitolyo.

Sa katapusan ang pagdasig sa amahan sa lalawigan sa mga magdudula nga ang sentro sa aktibidad dili mao ang pagdaug kondili ang pag-establisar ug teamwork ug sportsmanship nga mapakita sa matag-usa nga mamahimo unyang ang-angan sa maayong pagserbisyo alang sa katawhan sa Zamboanga del Sur.