Gov. Yu subli nga mipahayag sa iyang suporta sa population management ug RPRH Law

Pagadian City (Agosto 30, 2019) - Subli nga mipahayag sa iyang suporta si Gov. Victor Yu sa population management ug RPRH Law atol sa gipahigayon nga Regional Population Management Congress sa Four Queen’s Resort kagahapon sa hapon, Agosto 29.

Si Gov. Yu nahimong pinasidunggang mamumulong sa maong conference nga gitambongan sa Regional Director sa Commission on Population sa Rehiyon 9 nga si Dir. Reynaldo Wong, Regional Director sa DepEd nga si Dir. Isabelita Borres, mga health professionals gikan sa nagkalain-laing probinsya, mga volunteers ug uban pang ahensya sa gobyerno.

Sa pagpamulong ni Gov. Yu, giila niya ang importansya sa population management sa pagpalambo sa kalidad sa kinabuhi, ug mipadayag sa iyang suporta sa pag-implementar sa Responsible Parenthood and Reproductive Health Act kon RPRH Act of 2012.

Mahinumdoman nga usa si Gov. Yu sa mga mibotar pabor sa kontrobersyal nga RH bill panahon sa iyang ikaduhang termino isip kongresista sa unang distrito.

Matud pa niya nga ang iyang pagboto giniyahan sa iyang obserbasyon base sa kahimtang sa mga pamilya sa iyang distrito kon hisgutan ang kapobrehon ilabi na sa mga mag-uuma sa kabukiran.

Gisulti sa gobernador nga kinahanglan dunay intervention gikan sa gobyerno aron mapalambo ang livelihood sa mga pamilya mao nga mibotar siya pabor sa maong balaod.

Gisaysay usab sa gobernador nga parehong misyon sa health sector ug sa lokal nga pangagamhanan ang pagsuporta sa mga lakang aron mas mapasabot ang mga benepisyo sa gitawag ug responsible parenthood.

Gipamahayag usab sa amahan sa lalawigan nga ang pagdaghan sa miembro sa pamilya resulta sa walay saktong edukasyon ug impormasyon sa family planning, rason nga kinahanglan mapabati ngadto kanila ang pagbaton ug giniyahan nga desisyon sa pagplano sa ilang pamilya alang sa ilang maayong kaugmaon.

Sa katapusan sa iyang mensahe, gidasig ni Gov. Yu ang mga opisyal sa PopCom ug supporting agencies nga mas pahugtan pa ang health promotion and communication campaign sa family planning ilabina sa mga rural areas sa rehiyon ug andam ang probinsya sa pagsuporta niini.

Gov. Victor Yu naninguha nga mahimung usa ka drug free nga lalawigan ang Zamboanga del Sur

Pagadian City (Agosto 30, 2019) – Atol sa gipahigayong conference kauban ang mga media personnel sa lalawigan sa Zamboanga del Sur gipaabot sa gobernador ning lalawigan ang iyang hagit ngadto sa mga tigpatuman sa balaod kini kalabut sa umaabot nga selebrasyon sa National Crime Prevention Week.

Atubangan sa mga office heads sa NAPOLCOM, DILG ug PNP, gipaabot sa gobernador ang iyang suporta ngadto sa nagkadaiyang ahensya aron sa pagsugpo sa kriminalidad, terorismo ug illegal nga druga. Sigun pa sa gobernador nga gusto niya nga mahimung drug-free ang probinsya. Iyang gipasalig nga anaa kanunay ang suporta sa probinsyal nga pangagamhanan sa ilang mga programa.

Gidugang pa niya nga ang iyang administrasyon ang lig-on sa pagsuporta sa mga kahago sa military ug pulis pinaagi sa paghatag kanila ug mga ekwipo nga magamit nila sa komunikasyon, transportasyon, fuel support ug ingun man lakip na ang infrastratura.

Gihatagan usab ug katin-awan sa gobernador nga ang kalinaw ug kahapsay dili lang alang sa mga pipila apan responsibilidad sa matag usa sa komunidad.

Dugang pa sa gobernador nga dili mahimu sa gobyerno kung wala ang katawhan. Nanginahanglan sila sa kooperasyon ug partisipasyon sa mga katawhan sa lalawigan labi na sa pagsugpo sa kriminalidad.

Mahitungod sa problema sa probinsya, gipaabot sa gobernador nga ang good governance mao ang yawi arun masulbad ang insurgency ug kakabus. Dugang pa niya nga aduna na siyay naka plano nga one time, big time outreach diin ang tanang national nga ahensya ang mahimung makatimbayayong aron sa paghatud sa mga nag-unang serbisyo ngadto sa mga barangay nga apektado sa insurgency. Gipaabot usab niya ang mahitungod sa paghimo ug bisitasyon sa mga kabarangayan arun sa pagpa-uswag sa panginabuhian sa katawhan sa ilang mga dapit.

Sa katapusan, gipaabot sa maong leader nga kung mabati sa katawhan nga ang gobyerno para sa ilaha ug makahimu silang maka apil sa mga kalihokan sa gobyerno kani dakung tabang ug maayo para sa ilaha.

Congw. Divina Grace Yu gitudlo isip chairperson sa committee on inter-parliamentary relations and diplomacy

 Pagadian City –Nakakuha sa 18th Congress ug bag-ong House Committee chairmanship ang representanti sa unang distrito sa lalawigan sa Zamboanga del Sur, Hon. Divina Grace Yu.

Sa iyang facebook page, gibutyag sa nasangpit nga representanti sa nakalabayng Miyerkules nga gitudlo siya isip Chairperson sa Committee on Inter-Parliamentary Relations and Diplomacy.

Ang 45 nga membro sa maong House Committee ang direktang ug unang may kalabutan sa mga inter-parliamentary linkages ug adunay organisasyon sa international nga parlyamentaryo ug ingon man dili limitado sa ASEAN Interparliamentary Assembly (AIPA), Asian-Pacific Parliamentarians’ Union (APPU), Asian Parliamentary Assembly (APA) ug sa Inter-Parliamentary Union (IPU).

Ang maong committee ang responsable usab sa pagtukod ug pundasyon ug pakig relasyon sa mga inter-parliamentary nga mga katilingban ug ingon man mupahigayon ug pagbisita sa mga delegasyon ug lakip na sa ubang mga foreign dignitaries.

Sumala pa sa maong kongresista nga misulti ang kanhing chief sa foreign affair nga si Speaker Alan Peter Cayetano, nga ang Chairperson sa nasangpit nga committee ang kinahanglang makigtrabaho pag-ayo sa iyaha.

Gibutyag usab sa bag-ong Chairperson nga gidugang ni speaker Cayetano nga ang tulo kanila ang makahimo ug dakong mga butang para sa presidente ug sa atong nasud.

Gipahayag usab sa maong Chairperson ang iyang pasalamat ngadto kang Cayetano ug nanumpa nga iyang pagabuhatun ang iyang tanang mahimo ug mutrabaho taman sa iyang makaya dili lang kutob sa pagrepresenta sa lalawigan sa Zamboanga del Sur apan lakip na usab sa nasud sa Pilipinas ngadto sa laing nasud.(ZSPPB)

Provincial administrator sa lalawigan sa Zamboanga del Sur gipahibalo pagbalik ang publiko mahitungod sa ‘No Balance Billing’ policy

PAGADIAN CITY (Aug. 6, 2019) - Gipahibalo pagbalik sa provincial administrator sa lalawigan sa Zamboanga del Sur, Mr. Joefe Suson ang publiko mahitungod sa 'No Balance Billing' policy nga gisunod sa Zamboanga del Sur Medical Center subay sa universal health care program.

Gipatin-aw ni provincial administrator nga ang No Balance Billing (NBB) policy makahimo sa mga yanung katawhan ug ingun man sa mga katigulangan nga wala nay mabayaran kung aduna man gali sobra sa PhilHealth coverage.

Ang No Balance Billing policy o mas naila nga “Walang Dagdag Bayad”, naghimu ug mga kondisyon diin walay bisan piso nga gipangayo sa usa ka pasyente bisan pa man sa gidugayon sa iyang pagka admit ug ang nahimong epekto niini mao ang paghatag ug tarung, dekalidad ug patas nga serbisyo sa mga benepesyaryo .