Provincial administrator sa lalawigan sa Zamboanga del Sur gipahibalo pagbalik ang publiko mahitungod sa ‘No Balance Billing’ policy

PAGADIAN CITY (Aug. 6, 2019) - Gipahibalo pagbalik sa provincial administrator sa lalawigan sa Zamboanga del Sur, Mr. Joefe Suson ang publiko mahitungod sa 'No Balance Billing' policy nga gisunod sa Zamboanga del Sur Medical Center subay sa universal health care program.

Gipatin-aw ni provincial administrator nga ang No Balance Billing (NBB) policy makahimo sa mga yanung katawhan ug ingun man sa mga katigulangan nga wala nay mabayaran kung aduna man gali sobra sa PhilHealth coverage.

Ang No Balance Billing policy o mas naila nga “Walang Dagdag Bayad”, naghimu ug mga kondisyon diin walay bisan piso nga gipangayo sa usa ka pasyente bisan pa man sa gidugayon sa iyang pagka admit ug ang nahimong epekto niini mao ang paghatag ug tarung, dekalidad ug patas nga serbisyo sa mga benepesyaryo .

Sa ekslusibo nga pakighinabi, gipaklaru sa nasangpit nga administrator nga ang NBB policy wala nagpasabot nga ang pasyente wala nay responsibilidad sa hospital tungod lang sa "no" or "zero" charges.

"Ang pasyente dapat nakalista na sa Philhealth panahon kung ma admit siya. Kung aduna pay laing mga bayranan sa hospital, ma cover na siya sa health insurance agency. Pero ug dili pa siya membro sa PhilHealth unya na admit na siya makapahimulos gihapon siya sa point-of-care enrolment mao nga iya ra gihapong matagamtaman ang mga benepisyo sa NBB", pagpasabot niya.

Sa Point-Of-Care (POC) Enrolment Program, kung ang pasyente muadto sa hospital unya dili pa membro sa PhilHealth automatic silang malista sa hospital.

Sa pangutana mahitungod sa economic enterprise nga na implementar sa medical center sa nakalabayng administrasyon, gipahayag ni Suson nga ang maong ordinansa wala nawala.

“Sa pagkatinuod lang wala na siya na angat kundili ang Sangguniang Panlalawigan nag pasa ug Resolution No. 026-2019 nga nagahatag ug otoridad ngadtu sa gobernador aron sa pag-ila kung unsay angay panasun ug kuhaun sa maong balayrunun", dugang pa niya.

Gidugang pa sa administrator nga atol sa ilang session, mi desisyon ang Technical Working Committee sa ZDSM nga uyunan ang maong singil ingon sa gipakita sa ordinansa tungod kay mao kana ang basihan sa bayronon nga malakip sa PhilHealth.

"Kung atong walaon ang mga balayrunun ug himuong 'zero billing' dili kita maka charge sa PhilHealth unya tungod niini ang atong hospital walay insaktong income para maka sustinar sa pagpadagan niini", gidugang niya.

Gidugang pa niya kung panahon adunay excess ang pasyente sa iyang bayrunun human makuhaan sa PhilHealth, mahimo siyang makapahimulos

sa indigency fund nga gi-deposito sa local government units sa nasangpit nga medical center.

Gidugang usab niya nga adunay pundo gikan sa opisina ni Congw. Divina Grace Yu ug Cong. Leonardo Babasa nga mahimong matagamtaman sa tanan panahon ug dili pa igo ang pundo alang sa mga bayranan. Aduna usab kaugalingong pundo ang opisina sa gobermador nga gigahin alang sa mga nanginahanglan ug sa ingon ma sustentuhan ang operasyon sa nasangpit nga hospital.

“Usa kini ka win-win solution. Ang pasyente mahimong mugawas nga walay pagabayaran ug ang hospital makahimong makapadayon sa iyang operasyon".

Sa katapusan, iyang gihatagan ug katin-awan nga kung sa natad sa paghatag ug health care ang probinsyal nga pangkagamhanan makapasalig nga muhatag sa patas nga pag serbisyo ngadto sa mga katawhan nga walay bahid sa pamulitika. (Press release and photo from ZSPPB)